Անդրադարձ - ahousekeeper-ին "Մատեան ողբերգութեան", ԲԱՆ ԾԵ-Դ

ahousekeeper-ին "Մատեան ողբերգութեան", ԲԱՆ ԾԵ-Դ

10 Мар, 2008 at 3:11 PM

Գողացան օտարք չարին գումարք`
Զստացուածս սրտիս իմաստից, ըստ գրոյն կանխաբանութեան,
Որով եկն եհաս իսկոյն աստանօր իմաստութեան ինձ նուազանալ,
Ըստ առակողին, և առաւելուլ ոչ բարւոյ ցանկութիւն:
Որ յառեցի զակն ոգւոյս ի գլուխն իմ կենաց Քրիստոս,
Որով ընդ ուղիղն հետևեցայց:
Քանզի կամելով ուժգինս ընթանալ`ընկլայ սաստկապէս,
Յանչափն ձգտիլ` իմոյն ոչ հասի,
Ի մեծագոյնն ամբառնալ` աստուստ գլորեցայ,
Ցերկնային ուղւոյն`անդնդոց մատնեցայ,
Ի զգուշանալն առաւել` յաւէտ վնասեցայ,
Յանարատն պահիլ` մանր խորտակեցայ,
Կարծելով ընդ ահեակն մրցիլ` յաջն գթեցի,
Ի զերկրորդն խուզել`զնախնին կորուսի,
Ի խնդիր սակաւուն` ի կարևոր ացն զրկեցայ,
Ի յուխտին պահել` դաշինն դրժեցի,
Առ սովորութեանն կտրիլ, կորուսիչս գտի,
Ի փոքունցն փախուցեալ` մեծամեծացն մատնեցայ,
Ձոր ես ինքն ինձէն ստեղծեալ`
Չարաչար դատախազ անձին կարգեցի:
Յորոց փրկել զմատնեալ գերիս դու միայն զօրեսցես`
Կենաց մատուցեալ զընծայեալս մահու զհոգիս,
Զի Դու միայն, Տէր Յիսուս, ճանաչիս բարերար,
Անսահման փառօք ընդ Հօր և Հոգւոյդ Սրբոյ օրհնեալ
Յաւիտեանս յաւիտենից.
Ամէն:

"Մատեան ողբերգութեան", ԲԱՆ ԾԵ-